睇完《尋找快樂的故事》（The Pursuit of Happyness），以爲自己睇左鬼佬《父子》，兩者共同之處有：

• 粵語片橋段，悲慘指數力壓梁天來，生活迫人，屋漏必定兼逢連夜雨，擺明想要觀衆滴完眼淚先准走；
• 小朋友都係名門之後，一個係司馬燕個仔，一個係Will Smith親生，兩位都十分搶戲，天生食娛樂圈飯；
• 郭富城和Will Smith都被提名影帝；
• 做阿媽嘅就算幾唔捨得，都要撇甩丈夫兒子，投奔新生活；
• 做老竇嘅無論幾窮，都要力爭做帶子洪郎，一個說：“阿boy要跟我！”；另一個就話：“Christopher stays with me.”

當然，鬼佬《父子》有積極意義得多，起碼Will Smith都肯發奮向上爭取機會入股票行做intern，唔似郭富城0甘折墮叫個仔去偷錢，自己就走去同條女去梳乎，如果仲想追求人間有希望的感覺的話，都係建議你去睇Will Smith好D，話嗮都係真人真事改編，唔係齋吹水，肯付出上天都會俾收穫的。

但若然你想尋找快樂，0甘就sorry囖，《尋找快樂的故事》係唔會令你找到快樂的真諦，因爲片中對於快樂著墨其實不多，就算有，也是很膚淺的那種。例如Will Smith所謂的快樂，係指股票經紀們的中產生活：開蓬跑車、豪門大宅、打高球、養蕃狗，然後再引述美國總統的一席話“快樂係要爭取嘅！”，明無？所以Will Smith就好積極邁向這個目標，最後成功，換個角度來看，就是典型嘅American Dream，與麥潤壽的口令“只要肯做，一定進步”有著異曲同工之處。

唔好誤會我話Will Smith演技差，亦唔好以爲我話這種生活態度唔啱，事實上我仲好buy添，只不過鬼佬《父子》純粹改錯名嗻，我始終認爲物質生活同快樂係兩回事，如果套戲簡單叫做《人善天不欺》我就可能無0甘高期望囖，依家你問我，我會建議你等DVD出或者上飛機先至睇都唔遲，如果一定要入戲院，睇《戰狼300》啦，話嗮場面都激D！