假設我今天係當紅歌手，如果香港特區政府邀請我唱《始終有你》，我究竟接唔接呢個job好呢？當然我知道政府搵得我唱就即係俾面我，話嗮只有當紅兼且形象健康先至有機會。但係個job本身真係好惡頂，政治正確淩駕一切，歌詞老土不在話下，爲了大包圍突顯多元化，無啦啦要加埋合唱團、莫華倫、粵劇名伶等共冶一爐，最後慌死上面唔高興硬要加兩句國語歌詞落去，死未！

就算我唔係反中亂港之士，呢啲本質同文革樣板戲無乜分別嘅靈魂less演出，除非我係真心好buy成件事（例如劑劑都好聽話好識撈嘅克勤、慧琳、祖兒等等），否則都幾想死。就好似怡紅院啲紅牌阿姑，明明可以揀客接，但係某日城中出名難服侍嘅權貴登門光顧，指定要紅牌阿姑坐枱，接左棧委屈自己，唔接又怕得罪權貴兼連累怡紅院，真係人在江湖身不由己，點解咁多人生交叉點嘅呢？

算把啦！我估我都係接job居多，畢竟未來幾個月肯定日播夜播。港台、無記同新城實掂硬，分分鐘連以播放率排名嘅《903專業推介》都可以打爆，唔好忘記今舖最頂癮係連K版都出埋，到時候唔止四台冧把溫，話唔定連“家姐紅”同“撩喱”都攻陷埋，一世人都無乜機會紅成咁，娘就娘啦，顧唔得咁多，一齊跟我唱：“香港始終有你！”

官方網站