點解你唔 ... ？
「尋晚點解你唔打電話俾我？」
「我好夜先至返到屋企，怕嘈到你屋企人你嘛。」
「咁點解你唔上MSN 吖？你擺明唔想見我啦！」
「點解你唔問下係咪我返工辛苦壓力好大呢？」
「咁點解你唔一早話我知？我知左咪唔會問囖！」
「我都好想你乜都話你知，但係你成日都好似審犯咁，有你講無我講，點解你唔可以對我溫柔D，體貼D呢？」
「你咁講即係話我唔溫柔體貼你啦！咁點解你唔諗下係邊個上次幫你還左D卡數吖？」
「我就係諗住早D還番嗮D卡數錢俾你，所以依家咪做兩份工囖。」
「點解你唔叫你細佬幫手嗻，喂，你呀媽佢都有份嗰噃！」
「點解你係都要扯埋我屋企人嗻？我屋企嘅野你唔好理咁多，你搞掂你自己屋企嗰筆先算啦！」
「你有無當我係你女朋友呀？點解我唔理得吖？」
「你可唔可以唔問咁多點解嗻？我真係頂你唔順，你咁鐘意問點解，點解你唔 ... 去死？」
*******
(音樂起）
劉美君：哪裏有挽救配方？
男聲 ：你話點解，點解，點解我哋咁失敗？點解，點解，點解？
劉美君：哪裏有挽救配方？
男聲 ：你話點解，點解，點解我哋咁失敗？點解，點解，點解？
「點解你唔」絕對係對任何關係的快速測試，正如驗孕即知的試紙，或者是民間傳奇中的照妖鏡一樣，但凡這四個字出現在任何對話當中，唔駛問阿貴，關係好極有限，夫妻不和，兄弟反目，情侶就算未分手，也命不久矣！
這關乎説話的藝術，同樣的事情有正面表述或者負面表述，而「點解你唔」就是負面表述的頭號代表，集質問、猜疑、控訴、不滿於一體。
例句一：「尋晚點解你唔打電話俾我？」如果當中有愛，你自然會換個説法，譬如：「尋晚我好想同你傾電話。」
例句二：「咁點解你唔上MSN 吖？」如果你關心對方，會改爲：「咦，MSN 好耐唔見你囖噃，你還好嗎？」
當然，這些拐過彎的説法不像「點解你唔」般直接到位，越是親密或長久的關係，我們就越不會為對方轉彎，一方面這是率直的表現，但同時間也代表take it for granted的態度，包括對方的感受。
點解你唔 ... 試下改口？
Reply to this
是的，說話的content固然重要，但presentation的手法就更加是一個問題．正如我在工作上認識一個人，她的口頭禪是「你唔知o架o勒」，頗有點「嗱o靚妹，ｏ阿姐依家塞錢入你袋」之意味，頗感討厭．
Reply to this
呢d其實係相向的，唔想對方用審犯或怪責的語氣同你講，調番轉來講你有無令對方有安全感呢？通常無尾飛陀或應承做但做唔到的時候就係扯火的導火線。擔帶一d，令對方放心就係令佢收聲的最有效方法。
Reply to this
0依，我以為男人反而鍾意女人直接d wor, 試過在對方好冷淡時用我所能最溫柔的語氣去問：「是否工作壓力好大呀?」結果是被反問「點解咁問」後加一句可唔可以直接d...我想除了要有誠意改下口，改成點樣亦是關鍵, 要學識較高招的packaging skill, 好攰.....
Reply to this