好友急忙報料，話今朝細閱《東方日報》時發現，永隆銀行原來係屬於姓伍嘅家族，而且第三代嘅接班人係叫「伍尚X」tim，問我其實係咪有關連， 因爲報紙仲話「尚」子輩有成四十幾人，下個永隆銀行掌陀人分分鐘會係小弟。我同好友講，香港姓伍嘅有米佬唔只永隆，美心集團都係伍家天下，可惜都係與小弟無關，人家住半山，我住大嶼山嗻！

同人都會唔同命啦，就算同名同姓同音都唔guarantee一樣大富大貴（李嘉誠、李家誠除外），我自己粗略估計「伍尚X」隨時有幾百人，都係族譜嘅功勞，隔左N年都仲有人跟。同樣好多人跟嘅族譜應該係「曾繁X」嘅「繁」子輩，我自己認識都有幾個，畢竟曾氏在香港都係望族，伍氏嘅scale相對細好多，難得「伍尚X」輩遍地開花，列祖列宗泉下應該幾安慰，而我更要特別鳴謝好友報料兼剪報啦！

2008年1月17日《東方日報》B6版「絲絲講場」