<音樂起>
新馬師曾 Rap:「我個心又喜，我個心又慌 ... 」（調寄：胡不歸之慰妻）

上星期鄧一哥開聲話藏有不雅照片都可能犯法，全城立刻譁然，雖然我都覺得處長番話十分之有問題，但無可否認互聯世界即時靜嗮，網民個個「心又喜心又慌」，喜者因爲捷足先登飽覽慾照；慌者因爲曾經上載、轉載、或藏有慾照，而害怕俾差佬捉去做替死鬼。

同時間，卻有一批人都係「心又喜心又慌」，就係曾經同陳冠希有過o野但係好彩仲未被公開嘅慾女們，她們上星期嘅心路歷程隨時可以寫成書，一方面可能為陳、鍾、張小姐感到難過悲哀，但係泥菩薩過江都自身難保，全世界都想知道誰是第四名之際，鄧處長猶如救世主令事情急刹車，以爲飲得杯落。但係群情太洶湧，警方都知講錯，副處長尋晚急忙捕獲，澄清轉載俾friend睇係無犯法。可憐的慾女們既刻跌番落地獄，唔夠24小時電視新聞已經話第四個疑似藝人已經曝光，姑勿論真假，心血少啲隨時會死。

<音樂起>
關菊英 Rap:「問君何所欲，問君幾時先至滿足 ... 」（調寄：事事未滿足）

哼，普羅市民又點會滿足？咸濕風暴上演超過一個禮拜不但無減退反而越燒越烈，其他重要新聞例如：股市V型反彈、大陸雪災、美國Super Tuesday、程翔釋放等等仍然無損陳冠希繼續雄霸報刊雜誌封面。無論點呼籲、點道歉，就算俾你拉到所謂源頭又點？呢個故事最最最緊要嘅教訓就係阿媽成日話嘅帶眼識人，如果唔係點？慾女心驚lor!