無聲狗 ...  咬死人；
沒哭聲的女子 ...  就梗係《奪命佳人》，或者麥潔文！  （爛gag）

記得當年睇完《奪命佳人》，確實有D眼濕濕，無辦法，又真係幾慘絕人寰，阿仔無左阿媽，老竇做陳世美，阿公又被迫入老人院，家破人亡。而最最最緊要莫過於林青霞被監生推落海，仲要毀埋容，真係唔講得少，今日你問我林青霞同李嘉欣揀邊個，唔駛問阿貴梗係兩個都要嗮，但如果真係要揀，就一定先揀阿Brigitte然後先至到阿Michelle，畢竟一個有演技又肯犧牲，另一個就 ... ！

今晚重溫舊片，雖則内心無左當日之跌宕激情，但係依然無損投入感，因爲好明顯睇得出當年係攞個心出呢拍，劇本好認真（即使今日發現劇情其實都有幾多反駁嘅地方），演員亦交足戯，梁家輝、林青霞、石堅加埋都係大卡士，李泳豪童星戯好搶，絕對唔輸原島大地、吳景滔。不過功不可沒反而是麥潔文，不是她的演出，而是《沒哭聲的女子》的細膩演繹，完全唱出絕望婦人嘅終極控訴，全片亦充分利用呢首主題曲做配樂，胡大爲總算把顧家輝嘅心血發揚光大。

我相信當年應該有入圍香港金像獎最佳電影歌曲提名，但懷疑輸左俾《最愛是誰》，唉，既生瑜，何生亮呢？只怪當年太人才濟濟，大鳴大放，唔似今年居然係《逼得太緊》（十分愛）贏左，唔係首歌差，不過係要同部戯度身訂造先至合理，唔信睇番條舊片就會明我點解。

《沒哭聲的女子》去片