兩年前的舊電影與十天前的舊新聞，本來風馬牛不相及，但恰巧那天都給我看了。陽光小小姐和張如城都追逐理想，爲何前者就係正面教材，連教會都舉辦電影欣賞會；但係後者就俾全民（包括本人）公認係笑柄，he's a fool, he's a joke？

我從陽光小小姐學會了一連串正面的東西：
（1）敢做自己。正如片中Olive老母話: "let Olive be Olive"
（2）明確目標。Olive就係要贏Little Miss Sunshine第一名
（3）樂觀開朗。縱然全家都屬於dysfunctional 的一種，Olive仍然可以釋放無限正能量
（4）有家人撐。全家總動員由New Mexico千里長征去California，體現「一家人齊齊整整」嘅精神
（5）肥=可愛。美國小姐都同Olive講鐘意食雪糕唔駛怕肥

張如城其實都有嗮上述嘅attribute：
（1）敢做自己。城城絕對係做自己，我唔覺佢有任何人嘅影子
（2）明確目標。亞洲神童出唱片，前後出過兩張，仲話要有第三張
（3）樂觀開朗。連蘋果記者都讚他EQ高，佢D歌又好正面，例如《友誼的光彩》《真愛是真》
（4）有家人撐。梗係神童阿媽啦，又pump水又做埋經理人
（5）肥=可愛。睇睇佢嘅baby fat就知

如果我個七歲大嘅女同佢外公夾埋排左part兒童脫衣舞，我應該俾定唔應該俾佢上台呢？如果我個生得有少少似“William 哼”嘅十三歲仔同我講話要出唱片，我究竟係咪要連棺材本都攞埋出來先至啱呢？係咪有信心就一定可奪金？係咪鬼佬世界比較包容，華人世界就要比較批判？咁點解古人咁歌頌「知其不可而爲之」嘅精神？人究竟係要「貴自知」，定還是「貴嘗試」？

我唯一想得出比較講得通嘅理由，就係陽光小小姐畢竟係活在電影裏面，光影世界天馬行空想點就點；回歸現實世界，城城，我都係勸你早點歸去好啦！