話嗮都喺社會工作超過十年，自己都唔明點解唔化，究竟係咪無鬼謂多餘嘅執著，返工嚟家嘢不外乎攞人工交功課，人家無話過請我返嚟係要令自己開心，實情係要令老闆開心至真。

發咁多牢騷係因爲敝公司嘅「人肉政治佈景show」又要嚟嘞，近半年已經係好幾劑，每次都請埋嗮啲左到唔左嘅朝中權貴撥冗光臨敝公司進行private forum，被邀出席嘅都係近身禦林軍，無他嘅，如果係open forum，容乜易走咗個社民連入嚟仲得了，公司高層係想搞政治PR，搞嚄咗得罪中環西環咁點算。

唔知有幸定不幸，除咗有一次無我份之外，之後幾劑都被點中，而第一炮就係真鷹哥哥，講真鷹哥嗰場我都算交到足，我同自己講反正成世仔都無乜有過機會同左派中人零接觸近距離，咪當俾機會聽聽對方立場都好，而我都OK認真瀏覽過阿鷹哥嘅博log，仲交足戲問咗條「你認爲成功領袖要有乜條件呢？」，都算係咁啦。

但我似乎天真同埋傻，無預計會一浪接一浪，而第二炮係妖宗叔叔，基本上都O咗嘴，佢話要嚟講高鐵同八十後，高鐵我自己係贊成嘅，八十後就無意見，可惜成個forum我點都無法搵到in common嘅元素，除咗大家都屬於新界西以外，anyway，乖乖做佈景板坐足成粒鐘，陰功！

嚟緊第三炮會係鱔波伯伯，查實我連佢個樣係點我都唔知，諗起又要呆坐成個鐘就已經覺得無鬼聊，其實公司咁大應該都總會有啲政治理念同佢哋相同嘅人嗻，sorry講句呢啲所謂reach out to the community嘅政治PR真係開錯我嗰瓣，再諗深啲，其實最深層次矛盾會唔會係我根本就唔應該做佢啲禦林軍呢？

忽然諗起友人們提起過嘅金句「有得必有失，為名定爲利」，我幾時先化呢？