日期：星期六
時間：下午
地點：中環梯旁某裁縫店

*******

客人：（推開玻璃門）唔該我想做恤衫。
店員：（笑臉）歡迎，好似第一次嚟噃。
客人：係呀。
店員：諗住做乜嘢款呢？
客人：平時返工嗰啲啦（環顧四周）。
店員：布料喺嗮度，都係350蚊，三件1000，慢慢揀咗布先，有需要就叫我。

~五分鐘後~

客人：（指向藍白條子）唔該，要呢款布啦。
店員：OK，咁度身先，你想做鬆身定貼身啲（軟尺移動）？
客人：貼啲好，近排興嘛！
店員：啊，你有做開gym架（疑似發現新大陸）？
客人：（少許錯愕）無啊，淨係跑街咋。
店員：無，見你上圍好勁，估你有健身啫。
客人：（半信半疑）唔算勁啫，有幾多呀？
店員：嗱你睇，39吋胸，OK勁架。
客人：咿咦，以前得37架咋（沾沾自喜）。
店員：你做埋gym肯定過40吋，分分鐘上41。
客人：唏要咁大仲乜鬼呀（口是心非），又唔係要同周秀娜鬥，我呢啲叫胸大杯細肚腩凸，好唔掂至真！
店員：都唔係呀，度一度（軟尺游走）... 嗱，34吋咋，況且我哋度做恤衫先至要攞最大腰圍，你買褲肯定唔駛34（自信語氣）。
客人：（暗喜）你又幾凖喎，我褲頭32咋，牛仔褲唔纜皮帶會甩添。
店員：咪係，同埋你兩邊肩胛骨個位好大舊，膊頭到膊頭算濶，尤其後面睇就有倒三角。
客人：係咩，咁又真係唔駒（笑不攏嘴）。
店員：嗱，恤衫背脊左右兩邊位我幫你修埋褶，包你有綫條。
客人：好啦好啦，先做一件，掂嘅話即刻加單。
店員：好多謝嗮先！

*******

客人推開玻璃門，昂首挺胸離開裁縫店，陽光打落在他的臉上，一陣清風吹來。
（音樂起：PRIDE IN YOUR EYES  為我改寫下半生  眉目裡  找到我  失去的  自信心）
熙來攘往的中環街道上，疑似倒三角的背影，逐漸消失於人群中。